ورشة نَفَس
أسئلة وأجوبة

شو بالظبط منعمل بالورشة وليش؟

الإبحار في الذات، رحلة اللي فيها منعيد تواصلنا وقدرتنا على البحث بدواخلنا، السؤال والتعبير بأمان  وبأكثر الأشكال اللي بتشبهنا. 

عن طريق الصوت، النَّفّس، الحركة ، التأمّل الصوتي، الخيال البصري الموجّه الكتابة الحدسية والفنون منتحرك بمدارات شخصية بفلك نسائي بغاية الاصغاء للأصوات اللي جواتنا اللي منعطيهاش صوت، البحث والتنفيس عنها وفتح شق صغير بالمفهوم ضمناً وشبابيك بقلوبنا للاحتمالات لجديدة الممكنة ، القدرات الكامنة والأهم بغاية استكشاف مواردنا الذاتية وعظمة الفنون والتذكير بامكانية دمجها في تفاصيل حياتنا اليومية ولجوئنا لهاي الأدوات في رحلة تشافينا الذاتي.

 

كيف ممكن أعرف إذا الورشة بتحكيلي؟

إذا المنشور وقّفك، هاد أوّل مؤشّر :-) 

إذا حاسّة تعبتي من ضجّة الحياة و بحاجة توخدي استراحة من كل شي إلّا من عالمك الداخلي، تصغي لحالك، تثيري فوضى خلّاقة بكتير مسلّمات حادّة من امتدادك، تحفزي الجانب الإبداعي اللي فيكي، تنبشيه وتعطيه مساحة..

إذا حابّة تْرَجعي لمواردك، للتفاصيل، للممارسات والطقوس اللي جمّعتيها خلال السنين التقدير والامتنان والثقة بإنها تكون أدواتك اللي يمكن انفصلتي أو فقدتي إيمانك بقدرتها على إنها تكون بداية تشافيكي الذّاتي..

إذا حاسة إنّك علقانة بشي مرحلة وحاسّة بحاجة تسكتي الأصوات الخارجية وتسألي حالك الأسئلة اللي بتتجنّبيها ولتحاولي تشكّكي بالمفهوم ضمناً  وتتجرّئي تلمحي تفاصيل جديدة بالأفق وتصغيلا بصفاء ذهن ورواق.

أو بكل بساطة إذا كل اللي بدّك توقفي،

عنجد توق في،

توخدي نّ فّسسسس،

تماما متل ما وقّفتي إسّا وتفحصي أي شبابيك رح تفتح بقلبك .. بكون عم بستنّاكي.

 

لأي أجيال معدّة الورشة؟

مش متعلّق بجيل، متعلّق بإصغائك لحاجتك.

إذا بساعد توجيه، غالبية المشاركات عم بكونوا بين سن ال 20-55 بس الأرقام مجرّد أرقام منعد فيها المتشابه، إصغي لنفسك، كوني ال غير.

هل الورشة علاجية؟

لأ، لكن دون شك ممكن تعطينا مؤشرات جدا واضحة في حال كنا بحاجة نتوجه لجلسات علاجية لاحقة مع مختصين.

مضامين الورشة علاجية والأدوات علاجية، لكن الورشة ما فيها أهم أسس العلاج  وهو السيرورة. 

ممكن المشاركة في مدار واحد أو في مجموعة مدارات، ممكن المشاركة مع ذات المشاركات أو مع مشاركات متبدلّة في كل مدار. 

 

هل المشاركات بكملوا مع بعض بكل المدارات؟

كل مشتركة بتشترك بالتواريخ اللي بتلائمها. القرار برجع للمشاركات.

 

هل بالمدار منشارك بتفاصيل كتير شخصية؟

شكل ومضمون وكثافة المشاركة برجع للمشاركة نفسها، المدارات مجموعاتية بإطارها لوسيع العام لكن للعمق هي بالأساس فرديّة، كل مشاركة بتمرق مدارها الشّخصي بالأساس مع حالها.

 

هل بنفع آجي أنا وصديقتي أو قريبتي؟

القرار برجع للمشاركة ولمدى شعورها بالراحة اتجاه الغوص في أعماقها بصحبة أيا كانت.

 

هل بنفع أهدي حدا قريب عقلبي هيك ورشة؟

بكلّ حب، لكن بعد مشاركة اللي بتحبّي تهديها هاي الهدية بالمضمون وموافقها عليه حتى تقدر تستفيد وتستمتع، النيّة اللي منيجي معاها  بتأثّر بشكل جوهري على تجربتنا.

 

هل بنفع نشارك عالزوم؟

الورشة وجاهيّة:-)

 

كيف ممكن نحجز ورشة لمجموعة مسكّرة؟ وقديش ممكن يكون عددنا أقل أو أكتر إشي؟

بالتّنسيق المسبق بشكل مباشر معي، حتى يكون في ملائمة توقّعات وبعد الاتفاق عالتفاصيل ببعت رابط التسجيل.

في حال حابّة كتير أشارك بس العائق مادي؟

ممكن التواصل معي بشكل شخصي، هاد أبدا مش رح يكون العائق.

 

في حال ما كنش عنا فيزا كيف ممكن ندفع؟

 عن طريق تطبق Bit أو نقدي.

 

في حال اضطريت ألغي هل بستردّ المبلغ؟

إعادة المبلغ  بالكامل حتى 48 ساعة من تاريخ المدار.

 في حال تم التسجيل ولم يتم الحضور  للمدار ممكن التواصل الشخصي معي لفحص إمكانية الانضمام لتاريخ مدار جديد.

التواصل برسالة شخصية لمعالجة الموضوع في حالات الطوارئ . 

إعادة المبلغ الكامل للمشاركات في حال تم إلغاء أو تغيير التاريخ من قبلنا.

 

هل بحاجة أجيب معي إشي؟

قطعة ملابس دافية، قنينتك المي في حال بتحبي تخليها معك خلال الورشة،

والأهم تعالي بنيّة الاستمتاع، إنت جاي تهدي حالك نَفَس نضيف بتستحقّيه :-)